Friday, February 23, 2007

فى بيتنا شجرة


خير اللهم أجعله خبر كنت الأسبوع اللى فات رايح عند ناس قريبنا, أجازه بقى وأخرج زى ما أنا عايز, المهم وأنا ماشى فى الطريق لقيت الشارع واقف وزحمه جدا, أيه ده تفتكر فى لجنه ولاحاجه, يا نهار أبيض لجننننننننننننه لف و أرجع تانى بسرعه, يييييييييييييى يا بنى ما أنت خلاص طلعت رخصه والمفروض متخفشى من الحاجات دى, المهم وحده وحده كده عديت من الزحمه ورحت المشوار والحمد لله

تانى يوم ألاقى فى التلفزيون بيقولو ده فى شجره فى بداية طريق مصر أسماعليه مكتوب عليها لفظ الجلاله و أسم رسول الله محمد صلى الله عليه وسلم, أيه ده, ده الطريق اللى كنت ماشى منه أمبارح, أاااااااااااااااااه عشان كده الطريق كان زحمه, طيب الحمد لله دى حاجه كويسه أن الناس تلاقى حاجه زى كدا تحرك أيمانهم شوي

اللى مش كويس بقى أن فى بعض الناس بقوا يرورحوا للشجره عشان يتبركوا بيها يعنى ... اللى يحاول يمسح عليها... واللى عايز يا خد ورقه منها .... واللى .... واللى... وبدأت تظهر بعض الشركيات

و بدأت تبقى فى رحلات من مناطق مختلفه فى القاهرة وخارجها عشان يجوا يتفرجوا على الشجره و ماهي بقيت شجرة مباركه خلاص

فالمشكله الكبيرة أن بقت الناس تعمل حاجات غلط جدا عند الشجره ده نهيك طبعا عن الزحمه اللى بتوقف حال الناس فى الشارع, وبدأت البرامج فى التلفزيون تتكلم عن الشجره اللى يقول دى أيه من أيات الله واللى يقول لأ دا فى حد نحت الكلام ده عليه واللى يقول .... واللى يقول....

بااااااااااااااااااااااجماعه أحنا مش محتاجين حاجه تثبت لينا أن الكون ده كله يعبد الله عزوجل وأن كل شئ يسبح له لأن القرأن والسنه بيقروا الكلام ده, دا بقى بصرف النظر أن كان لفظ اجلاله أكتب لوحده على الشجره أو أحد كتبه عليها

كان فى فترة خلافة أمير المؤمنين سيدنا عمرو بن الخطاب رضى الله عنه, كان فى بعض التابعين بيدورو على الشجرة اللى بياع عندها الصحابه رسول الله صلى الله عليه وسلم وكانوا بيتحروا الصلاه عندها

قأمر أمير المؤمنين بقطع الشجرة منعا للفتن

----------------------------------------

رساله صغيرة

فى بعض البرامج وتحدبدا (البيت بيتك) كان فى واحد بيقول أن فى حد كتب على الشجره لفظ الجلاله من زمان عشان الناس تجيلها دلوقتى فيفتح فرصة عمل ليه ولغيره (المشروبات والمأكولات... والكلام ده)

أنا بس كنت عايز أقوله, يا فندم لو كان فى ناس فى بلدنا بيفكروا بالأسلوب ده وعندهم الفكر التخطيطى الرائع ده ماكنشى ده بقى حالنا

No comments: